Manuscripts/TargB

Targum to the Bomberg Bible

Name: Second Bomberg Bible/Second Rabbinic Bible of Jacob ben Chayyim
Text: Rabbinic Targum
Writing style: Square script
Date of publication: 1524
Place of publication: Venice
Published editions: Bomberg, Daniel, et al., editors. Biblia Rabbinica. Venice: 1524-25.
ben Ḥayyim ben Isaac ibn Adonijah, Jacob, and Moshe Henry Goshen-Gottstein, editors. Biblia Rabinnica: a reprint of the 1525 Venice edition by Jacob ben Hayim ibn Adoniya. Jerusalem: Makor Publishing, 1972.
Online availability: images

Text

[Volume IV] [folio 124v]
וְאָתִיב יְיָ יַת אִיוֹב מִן עַלְעוֹלָא דְצַעְרָא וַאֲמָר
׃ מָן הוּא דֵין כְּמַחְשִׁיךְ מַלְכָּא בְּמִילַיָא
מִדְלֵית מַנְדְעָא׃ זְרַז כְּרוֹן הֵיךְ גִיבָּרָא
חַרְצָיֲךְ וְאֶבְעִינָךְ וּתְהוֹדָעִינָנִי׃ הָאן הֲוֵיתָ
בְּמִשְׁתָּסֵי אַרְעָא חַוֵּי אִין יְדַעְתָּא בֵּיוַנְתָּא׃
מָן שַׁוִּי מְשַׁחְתָּא אֲרוּם תִּנְדַע אוֹ מַן מְתַח
עֲלָהּ מַתְקוֹלְתָּא׃ עַל מָה סַמְכִייָהָא טְמִיעַן
אוֹ מַן שְׁדָא אֶבֶן זִיוְיָיתָהּ׃ בִּזְמַן דִמְשַׁבְחִין
כַּחֲדָא כּוֹכְבֵי צְפָר וִמְיַיבְּבִין כַּל כִּיתֵּי מ
מַלְאָכַיָא׃ וְאָגֵף בְּדָשַׁיָא יַמָא בִמְגִחֵיהּ מִן
תְּהוֹמָא דְמן רַחֲמָא יִפּוֹק׃ כַּד שַׁוִיתִי עְנָנָא
כְּסותֵיהּ וְאַמְטִיתָא לִיפוּפֵיהּ׃ וּפְסָקית
עֲלוֹי גְזֵירָתִי וְשַׁוִיתִי פְרִירֵַיָא הֵיךּ נִגְרִין
וְדָשִׁין׃ וְאֲמָרִית עַד כָּא תֵיתֵי וְלָא תוֹסִיף
וְכָא תְשַׁוֵּי בְגֵיוְתַנוּת גַלְלָיָךְ׃ הֲמִן יוֹמָךְ
פַּקִידְתָּא צְפַר יִידָעְתָּא לִקְרִיצָתָא אַתָרֵיהּ׃
ת״א הַבְיוֹמֵי בְּרֵאשִׁית הֲוֵיתָא וּפְקַדְתָּא
לְמֶחֱוֵי צְפַר יְדָעְתָּא לִקְרִיצָתָא אַתְרֵיהּ׃
לְמֵיחַד בְּגַדְפֵי אַרְעָא וִיטַלְטְלִין חַיָיבַיָא מִינָה
׃ ת״א לְמֵיחַד בְּסִטְרָא אַרְעָא דְיִשְׂרָאֵל
וְאִטַלְטלו דָרָא רַשִׁיעֲיָא מִינָהּ׃

[folio 125r]
מִתְהַפְּכָא הֵיך טִינָא חוֹתָמָא דִילְהוֹן
וְאִיתְעַתְּדוּן הֵיך כְּסוּ זְהִים׃ ת״א
אִתְהַפְּכַת הֵיך טִינָא חוֹתָמָא דִּלְהוֹן וְלָא
אִתְבְּרִיאוּ כְּמוֹ גּוּשְׁמֵיהוֹן בְּלָא נִשְׁמַתְהוֹן הֵיךְ
כָּסוּ סְרֵיק׃ וְאִתְכַּסֵי מִן רַשִׁיעֲיָא נְהוֹרֵהוֹן
וְאֶדְרַע מְרַמְמָא תִּתְבָּר׃ אֵיפְשַׁר דַעֲלָתָא עַד
מְעַרְבְּלֵי סְגוֹר יָמָא וּפִשְׁפוֹשׁ תְּהוֹמָא הַלִיכְתָּ‌֜
׃ אֵפְשֵׁר דְאִתְגְלִיאוּ לָך מַעֲלָנֵי מוֹתָא
וּמַעֲלָנֵי טוּלֵי מוֹתָא דִגְהִנָם תֶּחֱמֵי׃
אִיתְבַּיְינַת עַד פְתָוֵוי אַרְעָא דְגִינְתָא דְעֶדֶן
חַוֵּי אִין יְדַעְתָּא כּוּלָהּ׃ אֵידֵין אוֹרְחָא
יִשְׁרֵי נְהוֹרָא וַחֲשׁוֹכָא הֵידֵין אַתְרֵיהּ׃
אֲרום תְּדַבְּרִינֵיהּ לִתְּחוּמֵיהּ וַאֲרום תִתְבְּיָן
שׁבִילֵי בַּייְתֵיהּ׃ הַיְדַעְתָּא אֲרוּם בְכֵן
אִתְיְלִיד וּמִינְיַין יוֹמַיִיך סַגִיעִין׃ אֵיפְשַׁר
דַעֲלָתָא לְקוּרְטורֵי תַּלְגָא וְאַפּותִּיקֵי בַּרְדָא
תֶּחֱמֵי׃ דִיגִנָזִית תַּלְגָא לְעִידַן עַקְתָא בִּגְהִנָם
וּבַרְדָא לְיוֹם קְרָבָא דְּפַרְעֹה וְאַגְחותָא
דְמִצְרָאֵי׃ הֵידֵין אורְחָא יִתְפְּלִיגנְהוֹרָא
יְבַדַר רוּחַ קִדוּמָא עַל אַרְעֲא׃ מָן טַיִיף
לְשִׁטְפָא קוּבְתָא וְאִסְרַטָא לַעֲנַנֵי קָלַיָא׃
ת״א מָאן טָאִיף לְשִׁטְפָאדִתְהוֹמָא
חֲרִיצֵי מַיָא וּקְצַתְתוֹן דְלָא לְעַילָא וְורְחָא
לַעֲנָנֵי דִמַחְתִין מִתַּמַן מַיָא בְקַלְיָא׃ ת״א
מָאן עַבַד שִׁטְפָא לְמַרְזֵיבָא דְמַיָא ולְעֶילֲא
אֲרְחָא דַעְנָנֲא דְמָחִית מִטְרָא בְקָלִין׃
לַאֲחָתָא מִטְרָא עַל אַרְעָא דְלֵית בָּה גְבַר
מַדְבִּרָא דְלָא בַּר נַשׁבֵּיה׃ לְמִסְבַּע רְגוּשָׁא
וְאִתְרוּגְשָׁתָא ולְמַרְבְיָיא מַפְּקָנות דִיחָאָה׃
הַאִית לָמִטְרָא אַבָּא אוֹ מָן אוֹלִיד רְסִיסֵי
טַלָא׃ מִכְּרֵיסָא מָן נָפִיק קָרָחָא וּגְלִידָא
דִשְׁמַיָא מַן יְליד יַתֵיהּ׃ הֵיךְ אַבְנָא מוֹי
קְרִישַׁן וּמִיטַמְרָן וְאַפֵּי תְהוֹמָא דְמִן קוֹרָא
מִתְאַחֲדִין׃ הֲתִקִטוֹר שִירֵיכִּימָתֲא אוֹ אַשְלֵי
דְנַגְדִין נִיפְּלָא תִשְׁרֵי׃ הֲתַפִּיק שִׁטְרֵי
מַזָלַיָיא בִּזִמְנַיהּ וְזַגְתָא עַל אַפְרְתָהָא
תַּדִבְּרִינוּן׃ הַיְדַעְתָּא גִזֵירָתָא דִשְׁמַיָא אִין תְּשַׁוֵּי שִׁטְרֵיה גַלְגֵלֵיה בְּאַרְעָא׃ אֵפְשַׁר דְתָרִים לְעָבָא
קַלָךְ וְרִיכִפַּת מַיָא תַּחְפִּינָך׃ אֵיפְשַׁר תְּשַׁדַר בַּרְקִין וְיַהֲכוֹן לָךְ הָא אַנָן׃ מַן שַׁוִּי בְּכָלְיָין
חוֹכְמְתָא אוֹ יְהַב לְלִיבָא בִּינָתָא׃ ת״א לְתַרְנְגוֹל בָּרָא בְּיונְתָא לִמְקַלָסָא לְמָרֵיהּ׃

[folio 125v]
מָן יְמַנֵי שִׁבְעָתֵי שְׂמַיָא בְּחוּכְמְתָא וכִילְוַות
שְׁמַיָא מָן יִשְרֵי׃ ת״א מָאן יִמְנֵי כּוֹכְבֵי
שְמַיָא בְחוּכְמְתָא וַעֲנָנֵי דִמְתִילִין לְזִקַיָא
דִשְמַיָא מָאן אַשְכִּיב׃ כַּד אִישְׁתָּאָם עַפְרָא
לְשִיתְאָסָא וְגַרְגִישְׁתָּא אִידְבָּקוּ׃ הֲתָצוּד
לְלֵיתָא מֽזוֹנָא וּפַרְנָסוּתָא דֽאַרְיְוָתָא תְּסַפֵּק׃
אֲרוּם שַׁחֲיָין בַּמְדוֹרָתָא יֵהבון בִּמְטַלָלְתָּא
מְטוּל לִכְמָנָא׃ מָן יְתַקֵן לְעוּרְבָא מְזוֹנֵיהּ
אֲרום בְּנוֹי לֶאֱלָהָא יִבְעוּן תַּעֲיָין מִדְלֵית
מִיכְלָא׃ אֵיפְשַׁר דִידַעְתָּא עִידַן מֵילְדֵיהוֹן