Manuscripts/MTP

Hebrew Text of the Paris Polyglot

Name: Hebrew text of Paris Polyglot
Text: MT
Writing style: Square script
Date of Publication: 1645
Published edition: Le Jay, Gui Michel. Biblia. 9 volumes. Paris: A. Vitra, 1645.
online availability: images

Text

[p. 288]
1 ויען יְהֹוָ֣ה אֶת־אִ֭יּוֹב מִן־הַסְּעָרָה וְיֹּאמַֽר׃
2 מִ֤י זֶ֨ה׀ מַחְשִׁ֖יךְ עֵצָ֑ה בְּ֜מִלִּ֗ין בְּֽלִי־דָעַֽת׃
3 אֱזָר־נָ֣א כְגֶ֣בֶר חֲלָצֶ֑יךָ וְאֶ֜שְׁאָֽלךָ֗ וְהֽוֹדִיעֵֽנִי׃
4 אֵיפֹ֣ה הָ֭יִיתָ בְּיָסְדִי־אָ֑רֶץ הַ֝גֵּ֗ד אִם־יָדַ֥עְתָּ בִינָֽה׃
5 מִי־שָׂ֣ם מְ֭מַדֶּיהָ כִּ֣י תֵדָ֑ע א֤וֹ מִֽי־נָטָ֖ה עָלֶ֣יהָ קָּֽו׃
6 עַל־מָ֭ה אֲדָנֶ֣יהָ הָטְבָּ֑עוּ א֤וֹ מִי־יָ֜רָ֗ה אֶ֣בֶן פִּנָּתָֽם׃
7 בְּרָן־יַ֭חַד כּ֣וֹכְבֵי־בֹ֑קֶר וַ֜יָּדִ֗יעוּ כָּל־בְּנֵ֣י אֱלֹהִֽים׃
8 וַיָ֣סֶךְ בִּדְלָתַ֑יִם יָ֑ם בְּ֜גִיח֗וֹ מֵרֶ֥חֶם יֵצֵֽא׃
9 בְּשׂוּמִ֣י עָנָ֣ן לְבֻשׁ֑וֹ וַ֜עֲרָפֶ֗ל חֲתֻלָּתֽוֹ׃
10 וָֽאֶשְׁבֹּ֣ר עָלָ֣יו חֻקִּי וָ֜אָשִׂ֗ים בְּרִ֣יחַ וּדְלָתָ֣יִם׃
11 וָֽאֹמַ֗ר עַד־פֹּ֤ה תָ֭בֹא וְלֹא תוֹסִ֑יף וּפֹ֥א יָ֜שִׁית בִּגְא֥וֹן גַּלֵּֽיךָ׃
12 הֲ֭מִיָּמֶיךָ צִוִּ֣יתָ בֹּ֑קֶר יִדַּ֖עְתָּהַ֯ שַּׁ֣חַר מְקוֹמֽוֹ׃
13 לֶ֭אֱחֹז בְּכַנְפּ֣וֹת הָאָ֑רֶץ וְיִנָּעֲ֖רוּ רְשָׁעִ֣ים מִמֶּֽנָּה׃
14 תִּ֭תְהַפֵךְ כְּחֹ֣מֶר חוֹתָ֑ם וְ֝יִתְיָצְּב֗וּ כְּמ֣וֹ לְבֽוּשׁ׃
15 וְיִמָּנַ֣ע מֵֽרְשָׁעִ֣ים אוֹרָ֑ם וּזְר֥וֹעַ רָ֜מָ֗ה תִּשָּׁבֵּֽר׃
16 הֲ֭בָאתָ עַד־נִבְכֵי־יָ֑ם וּבְחֵ֥קֶר תְּ֝ה֗וֹם הִתְהַלָּֽכְתֲּ׃
17 הֲנִגְל֣וּ לְ֭ךָ שַֽׁעֲרֵי־מָ֑וֶת וְשַֽׁעֲרֵי־צַלְמָ֑וֶת תִרְאֶֽה׃
18 הִ֭תְבֹּנַנְתָּ לְ֭ךָ רַֽחֲבֵי־אָ֑רֶץ הַ֝גֵּ֗ד אִם־יָדַ֣עְתָּ כֻלָּֽה׃
19 אֵיזֶ֣ה הַ֭דֶּרֶךְ יִשְׁכָּן־א֑וֹר ו֝חֹשֶׁךְ אֵי־זֶ֥ה מְקוֹמֽוֹ׃
20 כִּי תִ֭קָּחֶנוּ אֶל־גְּבוּל֑וֹ וְכִי־תָ֜בִ֗ין נְתִיב֥וֹת בֵּיתֽוֹ׃
21 יָ֭דַעְתָּ כִּֽי־אָ֣ז תִּוָּלֵ֑ד וּמִסְפַּ֖ר יָמֶ֣יךָ רַבִּֽין׃